අවුරුදු 24ක් සහ කිලෝමීටර් ලක්ෂ 5ක්: නැතිවුණු පුතාව හොයාගෙන මුළු රටම පීරූ තාත්තා!

දරුවෙක් කියන්නේ අම්මා කෙනෙකුට, තාත්තා කෙනෙකුට තමන්ගේ පණටත් වඩා වටින වස්තුවක්. ඒ දරුවා ඇස් මානයෙන් අතුරුදන් වුණොත් දැනෙන වේදනාව කොයි වගේ ඇද්ද?

මේක චිත්‍රපටයක කතාවක් නෙවෙයි, තමන්ගේ නැතිවුණු පුතාව හොයාගෙන අවුරුදු 24ක් මුළු රටක් වටේ යතුරුපැදියකින් ගිය සැබෑම වීර පියෙකුගේ කතාවක්.

ඔහු නමින් ගුවෝ ගන්ග්ටැන්ග් (Guo Gangtang). 1997 සැප්තැම්බර් 21 වෙනිදා චීනයේ ෂැන්ඩොං (Shandong) ප්‍රාන්තයේ තමයි මේ අවාසනාවන්ත සිදුවීම වුණේ.

එදා ගුවෝගේ වයස අවුරුදු දෙකක පුංචි පුතා, ගුවෝ ෂින්චෙන්, තමන්ගේ ගෙදර ඉස්සරහා මිදුලේ සෙල්ලම් කරමින් හිටියා. එක පාරටම එතනට ආපු නාඳුනන කාන්තාවක් මේ කිරිසප්පයාව උස්සගෙන පැනලා ගියා. මේක මුදල් වෙනුවෙන් ළමයින්ව විකුණන ජාවාරම්කරුවන්ගේ වැඩක්.

තමන්ගේ පණ වගේ හිටපු දරුවා නැතිවුණාම ගුවෝටයි එයාගේ බිරිඳටයි දැනුණේ මුළු ලෝකයම කඩාගෙන වැටුණා වගේ. ගම පුරා හෙව්වා, පොලිසි ගානේ ගියා, පත්තර වලට දුන්නා...

ඒත් කිසිම හෝඩුවාවක් ලැබුණේ නැහැ. අඬලා අඬලා කඳුළු වේළිලා ගියත්, මේ තාත්තා එක තීරණයක් ගත්තා. "මගේ පුතාව හොයාගන්නකම් මම ආයේ ගෙදර එන්නේ නැහැ".

ඔහු තමන්ගේ යතුරුපැදියේ පිටුපස විශාල කොඩි දෙකක් ගැටගහ ගත්තා. ඒ කොඩි දෙකේ තිබුණේ තමන්ගේ වයස අවුරුදු දෙකේ පුංචි පුතාගේ රූපයයි. එදා ඉඳන් මේ තාත්තා චීනය පුරාම යතුරුපැදියෙන් යන්න පටන් ගත්තා. වැස්සද, අව්වද, හිමද කියලා ඔහු බැලුවේ නැහැ.

අතේ සල්ලි නැති වුණාම පාරවල් අයිනේ, පාලම් යට නිදාගත්තා. සමහර දවස් වලට හිඟාකාලා වතුර බීලා බඩගින්න නිවාගත්තා. රළු පාරවල් වල යද්දී අනතුරු වලට ලක්වෙලා ඇටකටු කැඩුණත් ඔහු ගමන නැවැත්තුවේ නැහැ. පුතාව හොයන මේ ගමනට ඔහුට යතුරුපැදි 10ක් මාරු කරන්න සිද්ධ වුණා. ඔහු ගමන් කරපු දුර කිලෝමීටර් ලක්ෂ 5කට වැඩියි! (ඒ කියන්නේ ලෝකය වටේ 12 වතාවක් ගියා හා සමාන දුරක්).

මේ කතාවේ තියෙන සංවේදීම සහ පුදුම හිතෙනම කොටස ඒක නෙවෙයි.

මේ අවුරුදු 24 පුරාවටම තමන්ගේ දරුවාව හොයන ගමන්, ගුවෝ තවත් නැතිවුණු දරුවන්ව හොයන සංවිධාන වලට උදව් කළා. තමන්ගේ පුතාව හම්බුණේ නැති වුණත්, ඔහු තමන්ට ලැබුණු තොරතුරු වලින් වෙනත් පවුල් 100කට වඩා වැඩි ප්‍රමාණයකට තමන්ගේ නැතිවුණු දරුවන්ව හොයලා දුන්නා.

අනුන්ගේ දරුවන් තමන්ගේ අම්මලා තාත්තලාගේ තුරුලේ ඉඳන් සතුටු කඳුළු හලද්දී, ඒ දිහා බලලා හිනාවුණු මේ තාත්තා, ආයෙත් හිස් අත් දෙකෙන් තමන්ගේ යතුරුපැදියට නැගලා කඳුළු පිහදාගෙන තමන්ගේ පුතාව හොයන්න ගියා.

"මම පාරේ ඉන්නකම් මට දැනෙනවා මම මගේ පුතාට කිට්ටුයි කියලා. මම ගෙදර හිටියොත් මට පිස්සු හැදෙයි" ඔහු මාධ්‍යයට කිව්වා.

අවසානයේදී මුළු ලෝකයකම ප්‍රාර්ථනා ඉටු වුණා. 2021 අවුරුද්දේදී, ඒ කියන්නේ දරුවා නැතිවෙලා අවුරුදු 24කට පස්සේ, පොලිසියේ ඩීඑන්ඒ (DNA) පරීක්ෂණයක් හරහා ගුවෝගේ පුතාව හොයාගන්න සමත් වුණා. ළමා ජාවාරම්කරුවන් විසින් මේ දරුවාව වෙනත් පළාතක පවුලකට විකුණලා තිබුණා.

2021 ජූලි මාසයේදී ඒ අපූරු හමුවීම සිද්ධ වුණා. තමන්ගේ දෑතින් මිදිලා යද්දී යන්තම් ඇවිදින්න පුළුවන් වුණු කිරි දරුවා, නැවත තාත්තාගේ තුරුලට එද්දී වයස අවුරුදු 26ක තරුණයෙක්. වයසට ගිහින් සුදු වුණු කොණ්ඩය තියෙන මේ තාත්තා, තමන්ගේ තරුණ පුතාව බදාගෙන මහ හයියෙන් අඬපු හැටි මුළු ලෝකයක්ම කඳුළු පිරිච්ච ඇස් වලින් බලාගෙන හිටියා.

තමන්ගේ ජීවිතේ ලස්සනම කාලය පුතා වෙනුවෙන් මහ පාරේ දිය කරලා හැරපු මේ තාත්තාගේ කතාව, මුළු ලෝකෙටම කියා දුන්නේ මව් සෙනෙහසට දෙවැනි නොවන පිය සෙනෙහස කියන්නේ කොයි තරම් විශ්මිත, නොසැලෙන දෙයක්ද කියලයි.

මේ වගේ දේවල් අනිත් අයටත් දැනගන්න Share කරන්න අමතක කරන්න එපා

ෆේස්බුක් එකෙන් ඔයාට මේ වගේ වටිනා පෝස්ට් මිස් වෙනවාද? එහෙනම් දැන්ම ‘නොකී කතා – Untold Stories’ පිටුව Follow කරලා 'Favourites' දාගන්න. එතකොට අලුත් කතාවක් දාපු ගමන් ඔයාට ඉස්සෙල්ලම පෙනෙයි