ටාජ් මහල තුන් පාරක් විකුණූ ලෝකෙ ලොකුම 'ඩීල්' කාරයා!

නිකමට හිතන්න... ඔයා ඉන්දියාවේ සංචාරයකට යනවා. අග්‍රා නගරයට ගිහින්, ලෝක පුදුමයක් වුණු ටාජ් මහල ඉස්සරහා කට ඇරගෙන බලාගෙන ඉන්නවා. ඒ වෙලාවේ හරිම වැදගත් පෙනුම තියෙන, රාජ්‍ය නිලධාරියෙක් වගේ ඇඳගත්ත මහත්තයෙක් ඔයා ළඟට එනවා. එයා රහසින් වගේ ඔයාට කියනවා, "සර්, ඉන්දියානු ආණ්ඩුව මේ වෙලාවේ ලොකු ආර්ථික අර්බුදයක ඉන්නේ. ඒ නිසා අපි තීරණය කළා ටාජ් මහල වෙන්දේසියේ විකුණන්න. ඔයා කැමති නම් මේක ගන්න පුළුවන්..." කියලා.

ඔයාට හිනා යයි නේද? "පිස්සුද මනුස්සයෝ, ටාජ් මහල විකුණන්න පුළුවන් දෙයක්ද?" කියලා ඔයා අහයි. හැබැයි, මීට අවුරුදු ගාණකට කලින් ඉන්දියාවේ හිටපු එක සුපිරි මීටරයක් මේ වැඩේ කළා. එක පාරක් නෙවෙයි, දෙපාරක් නෙවෙයි... තුන් පාරක්ම එයා ඉන්දියාවේ ටාජ් මහල පිටරට සුද්දන්ට විකුණලා මාරු වුණා!

මේ තමයි "නට්වර්ලාල්". ඉන්දියාවේ විතරක් නෙවෙයි, මුළු ලෝකෙම හොල්ලපු, සියවසේ බිහිවුණු අති දක්ෂතම වංචාකාරයා.

නට්වර්ලාල් කියන්නේ නිකන්ම නිකන් පික්පොකට් ගහන හොරෙක් නෙවෙයි. නීතිය ගැන උපාධියක් තියෙන, ඉංග්‍රීසි භාෂාව කඩ්ඩ වගේ කතා කරන්න පුළුවන්, ඕනම කෙනෙක්ව විනාඩි දෙකෙන් අතේ නටවන්න පුළුවන් මහා මොළකරුවෙක්. එයාගේ ඇත්ත නම මිතිලේෂ් කුමාර් ශ්‍රීවාස්තව් වුණාට, මුළු ලෝකයම එයාව දන්නේ 'නට්වර්ලාල්' කියන අන්වර්ථ නාමයෙන්.

එයාගේ ගේම් එක පටන් ගන්නේ හරිම සියුම් විදියට. එයා ඉලක්ක කළේ ඉන්දියාවට එන ධනවත් විදේශිකයන්ව. රජයේ උසස් නිලධාරියෙක් වගේ ව්‍යාජ හැඳුනුම්පත් හදාගෙන, ආරක්ෂක නිලධාරීන් පිරිවරාගෙන එයා මේ සංචාරකයින්ව හම්බවෙන්න යනවා. ගිහින් කියන්නේ ටාජ් මහල නඩත්තු කරන්න ආණ්ඩුවට සල්ලි නැති නිසා රහසිගතව විකුණනවා කියලා.

හිතාගන්න පුළුවන්ද එයාගේ රඟපෑමේ තරම? එයා කොච්චර දක්ෂද කියනවා නම්, ඒ සුද්දෝ තමන්ගේ රටට ගිහින් ටාජ් මහල තමන්ගේ නමට ලියාගන්න එනකම්ම දන්නේ නෑ තමන් අහුවෙලා කියලා. අත්සන් කරපු ලියකියවිලිවල ඉන්දියාවේ ජනාධිපති රාජේන්ද්‍ර ප්‍රසාද්ගේ අත්සන පවා ඒ විදියටම තිබුණා. ඒ තරම් සියුම් ව්‍යාජ ලේඛන හදන්න එයා උපන් හපනෙක්.

ටාජ් මහල විතරක් නෙවෙයි, එයා රතු බලකොටුව දෙපාරක් විකුණුවා. එතනිනුත් නතර වුණේ නෑ. ඉන්දියාවේ ජනාධිපති මන්දිරය (රාෂ්ට්‍රපති භවන්) එකත් විකුණුවා. හැබැයි එයාගේ ලොකුම සහ ආන්දෝලනාත්මකම ගනුදෙනුව ඒක නෙවෙයි.

දවසක් එයා ඉන්දියානු පාර්ලිමේන්තුව පිටරට ව්‍යාපාරිකයෙක්ට විකුණුවා. නිකන්ම ගොඩනැගිල්ල විතරක් නෙවෙයි, එයා ඔප්පුවේ ලියලා තිබුණේ "පාර්ලිමේන්තුව සහ එහි සිටින මන්ත්‍රීවරුන් 545 දෙනාම ඇතුළුව" විකුණනවා කියලා! පාර්ලිමේන්තුවේ ඉන්න මන්ත්‍රීවරු ටිකත් තමන්ගේ දේපළක් කියලා හිතාගෙන සල්ලි දීපු ඒ ව්‍යාපාරිකයා ගැන හිතද්දිත් පුදුම හිතෙනවා නේද?

මේ මනුස්සයා පොලිසියට කොටු වුණේ නැද්ද? අන්න එතන තමයි කතාවේ රසවත්ම කොටස තියෙන්නේ. නට්වර්ලාල්ව පොලිසියෙන් අල්ලගත්ත වාර ගණන අනන්තයි. එයාට විරුද්ධව නඩු 100කට වැඩිය තිබුණා. අවුරුදු 113ක හිර දඬුවම් නියම වෙලා තිබුණා.

හැබැයි, එයා හිරගෙදර හිටියට වඩා වැඩි කාලයක් හිටියේ එළියේ. මොකද එයා හිරෙන් පැනගන්න එක කලාවක් කරගෙන හිටියේ. 1957 දී කාන්පූර් හිරගෙදරින් එයා පැනගත්තේ පොලිස් යුනිෆෝම් එකක් ඇඳගෙන, අතේ සල්ලි පිරුණු බෑග් එකකුත් අරගෙන, ගේට්ටුවේ හිටපු ගාඩ්ලටත් සලියුට් එකක් ගහගෙන! කාටවත් හිතුණේ නෑ ඒ යන්නේ ඉන්දියාවේ භයානකම වංචාකාරයා කියලා.

එයාගේ අන්තිම පැන යාම සිද්ධ වුණේ 1996 දී. එතකොට නට්වර්ලාල්ට වයස අවුරුදු 84ක් විතර ඇති. ඇවිදගන්න බැරි, රෝද පුටුවක යන අහිංසක මහලු ලෙඩෙක් විදියට තමයි එයා හිටියේ. පොලිසිය එයාව නවදිල්ලි දුම්රිය ස්ථානය හරහා රෝහලකට ගෙනියමින් හිටියා.

දුම්රිය ස්ථානයේ සෙනඟ අස්සේ පොලිස් නිලධාරීන්ගේ ඇස් වහන්න එයාට ගියේ තත්පරයි. රෝද පුටුව විතරක් ඉතුරු වුණා. අවුරුදු 84ක මහලු මනුස්සයා ආගිය අතක් නැති වුණා. එදා අතුරුදහන් වුණු නට්වර්ලාල්ව ආයේ කවදාවත් නීතියේ රැහැනට අහු කරගන්න කාටවත් බැරි වුණා.

සමහරු කියන විදියට එයා 2009 දී මියගියා. හැබැයි එයාගේ සහෝදරයා කියන්නේ එයා 1996 දීම මැරුණා කියලා. මැරුණෙ කොහොමද, කවදද කියන එකත් තාම අභිරහසක්. කොටින්ම කිව්වොත් එයා තමන්ගේ මරණය පවා වංචා කළා වෙන්න පුළුවන්.

ඉන්දියාවේ මිනිස්සු කියන විදියට, නට්වර්ලාල් කියන්නේ දුප්පතුන්ට උදව් කරපු 'රොබින් හුඩ්' කෙනෙක්. එයා වංචා කළේ කවදාවත් සාමාන්‍ය මිනිස්සුන්ට නෙවෙයි, දූෂිත ව්‍යාපාරිකයන්ට සහ කලු සල්ලි තියෙන අයට විතරයි. එයාගේ ගමට ගියාම එයා ලොකු සාද දාලා දුප්පතුන්ට සල්ලි බෙදුවා කියලා තමයි සදහන් වෙන්නේ.

අදටත් ඉන්දියාවේ කවුරුහරි ලොකු බොරුවක් කළොත්, මිනිස්සු අහන්නේ "උඹ නට්වර්ලාල්ගේ කවුරුහරිද?" කියලා. ඒ තරමටම මේ නම මිනිස්සුන්ගේ ඔළුවට කා වැදිලා තියෙන්නේ.

ටාජ් මහල තුන් පාරක් විකුණපු, පාර්ලිමේන්තුව මන්ත්‍රීවරු පිටින්ම වෙන්දේසි කරපු, අවුරුදු 84 දීත් පොලිසියෙන් පැනගත්ත මේ වගේ මනුස්සයෙක් ගැන අහද්දි ඔබට මොකද හිතෙන්නේ?

මේ වගේම ටයි කෝට් දාගත්ත, වැදගත් විදියට කතා කරන 'නට්වර්ලාල්ලා' අපේ රටෙත් ඕන තරම් ඉන්නවා නේද? එහෙම අය ගැන ඔයාගේ අත්දැකීම් තියෙනවා නම් පහළින් කියාගෙන යන්න.

මේ වගේ දේවල් අනිත් අයටත් දැනගන්න Share කරන්න අමතක කරන්න එපා

ෆේස්බුක් එකෙන් ඔයාට මේ වගේ වටිනා පෝස්ට් මිස් වෙනවාද? එහෙනම් දැන්ම ‘නොකී කතා – Untold Stories’ පිටුව Follow කරලා 'Favourites' දාගන්න. එතකොට අලුත් කතාවක් දාපු ගමන් ඔයාට ඉස්සෙල්ලම පෙනෙයි